नयाँ ब्रोकर कम्पनीको रेसबाट एनआइसी एसिया बैंक आउट, कम्पनी नै खारेज, कसले गर्‍यो आउट ?

                                                                          सुवास निरौला

            नयाँ ब्रोकर कम्पनीको लाइसेन्स लिने प्रक्रियागत रेसबाट एनआएसी एसिया बैंक आउट भएको छ। कम्पनी नै खारेज गरेर रेसबाट आउट भएपछि एनआइसी एसिया बैंकको सहायक कम्पनीले नयाँ ब्रोकरको लाइसेन्स नपाउने भएको हो।

            नेपाल धितोपत्र बोर्डमा नयाँ ब्रोकर लाइसेन्सको लागि ४६ कम्पनीले निवेदन दिएका थिए। जसमा एनआइसी एसिया बैंकको सहायक कम्पनीले समेत निवेदन दिएको थियो। एनआईसी एसिया सेक्युरिटिजले २० करोड रुपैयाँ चुक्ता पूँजी भएको कमिसन ब्रोकरको लागि बोर्डमा आवेदन दिएको थियो। तर उसले कम्पनी ब्रोकर लाइसेन्स लिन अनिच्छुक रहेको पत्र सहित बोर्डलाई जानकारी दिएपछि ब्रोकर रेसबाट आउट भएको हो। “उहाँहरुले कम्पनी नै खारेज गरिसक्नु भएको छ। कम्पनी रजिस्ट्रारकाे कार्यालयमार्फत नै खारेज गरेर धितोपत्र बोर्डलाई जानकारी दिनु भएको छ। कम्पनी रजिस्ट्रारमार्फत कम्पनी खारेज भएको चिठी हामीलाई दिएको कारण अब एनआइसी एसिया बैंकको सहायक कम्पनीले ब्रोकर लाइसेन्स पाउँदैन,” धितोपत्र बोर्डका प्रवक्ता मुक्तिनाथ श्रेष्ठले मेरो लगानीसँग भने।