अर्थमन्त्री महतले भने- नियमित व्यवसाय भनेको कतिसम्मको कारोबार हो, त्यो परिभाषित हुन्छ

 अर्थमन्त्री महतले भने- नियमित व्यवसाय भनेको कतिसम्मको कारोबार हो, त्यो परिभाषित हुन्छ

शेयर कारोबारलाई व्यवसायको रुपमा अंगाल्ने लगानीकर्ता आयकरको दायरामा आउनुपर्ने बताएपछि शेयर बजारमा दोस्रो दिन पनि पहिरो गएको छ ।

बजेट आएपछि नेपाल आर्थिक पत्रकार समाज (सेजन)ले बुधबार आयोजना गरेको कार्यक्रममा बोल्दै अर्थमन्त्री डा. प्रकाश शरण महतले नियमित शेयर कारोबारी जसको शेयर कारोबार बाहेक अन्य आम्दानीको स्रोत छैन र जसले वर्षमा करोडौं कमाउँछन्, त्यस्ता कारोवारी मात्रै आय करको दायरामा आउने संकेत गरे ।

उनले भने-'सर्वसाधारण शेयर लगानीकर्ता जसले बैंकमा भन्दा केही बढी कमाइ हुने आशाले शेयर बजारमा लगानी गरेका छन्, त्यस्ता कोही पनि लगानीकर्ता आयकरको दायरामा आउनुपर्ने भनेको छैन । ९९.५ प्रतिशत अझ ९९.९९ प्रतिशत लगानीकर्ता यो भित्र पर्दैन । यसबाट आत्तिनुपर्ने केही पनि कारण छैन ।' ५०-६० लाख लगानीकर्ता खत्तम भए जसरी प्रचार भएकोमा असन्तोष प्रकट गर्दै उनले नियमित शेयर कारोबारको व्यवसाय गर्ने र आम्दानीको स्रोत नै शेयर कारोबार बनाएका व्यक्ति भने त्यसमा पर्न सक्ने संकेत गरे ।

नियमित व्यवसाय भनेको कति सम्मको कारोबार गर्नेलाई भन्ने यसको निक्र्यौल भने अझै नभइसकेको उनले बताए । निश्चित रकमको कारोबार कति हो त्यो परिभाषित गर्न अर्थमन्त्री महतले निर्देशन दिइसकेको बताए ।

'जसले ठूलो मात्रामा पुँजी बजारमा लगानी गरिराखेको छ, जसको काम नै त्यही हो । यस्ताले नै शेयर बजारलाई स्वात्तै तल लाने र माथि लाने काम गर्छ । तल लगेर त्यो बेलामा किन्ने, अनि फेरि माथि लगेर तुरुन्तै बिक्री गर्छ । यस्ता कारोबारलाई हामीले सिस्टममा ल्याउने कि नल्याउने ?'- अर्थमन्त्री डा. महतले प्रतिप्रश्न गरे । उनले भेस्टेड इन्ट्रेस्ट भएकाहरु चौतर्फी रुपमा लाग्छन् भन्ने थाहा पाएर पनि इमान्दार भएर ट्याक्स नेटमा ल्याउने जोखिम मोलेको जिकिर गरे ।

उनले भने-'जो सानो जागिर खान्छ, ५-६ लाख रुपैयाँ वर्षमा कमाउँछ । उनले आफ्नो बचतबाट केही रकम शेयर बजारमा लगानी गर्छ भने उसले कर तिर्नै पर्दैन ।' उनले अगाडि भने-'जसले करोडौ करोड कमाउँछ, उसले चाँहि कर तिर्नुनपर्ने ? यो त हुने होइन होला । त्यसकारण यसलाई प्रणालीमा विस्तारै ल्याउन यो कदम चालिएको हो ।'

अहिले एकातिर राजस्व बढाउनुपर्ने चुनौती रहेको छ भने अर्कोतिर अर्थतन्त्र चलायमान बनाउनुपर्ने जिम्मेवारी रहेको बताउँदै उनले करको दायरामा आउनुपर्ने भए पनि केही प्रभावशाली व्यक्तिलाई छुन नसकिएको बताए । 'तिनीहरु पनि ट्याक्स नेटमा आउनुपर्छ, यसरी नै करको दायरा बढाउने हो।-'उनले भने ।